O Observatorio da Mariña pola Igualdade acolle con moita satisfacción a noticia feita pública pola dirección do xornal La Voz de Asturias, na que anuncia a súa decisión de retirar das páxinas do xornal os anuncios de contactos sexuais e os anuncios de prostitución. O Observatorio dálle a benvida a que o xornal asturiano, propiedade de Mediapubli, prime os contidos éticos por riba dos beneficios económicos, e así admita que “esta actuación supone una pérdida de ingresos por la eliminación de los anuncios fijos de prostitución y las secciones por palabras de contactos sexuales, pero entiende que la defensa de los principios éticos está por encima de la repercusión monetaria”.

Dado o compromiso que o Observatorio da Mariña pola Igualdade ten no traballo a prol da igualdade de xénero na nosa comarca, desde a asociación feminista animan a que os medios de comunicación escritos con máis representatividade na Mariña sigan este exemplo, e dean os pasos necesarios para poren en práctica a moción promovida no Congreso de Deputadas/os a nivel español no ano 2007. Iso implica adoptar unha decisión valente e coherente, na que o compromiso pola loita dos dereitos humanos (neste caso, o dereito á igualdade) se sitúe por riba dos intereses económicos que levan a que a prensa galega embolse arredor de 5 millóns de euros ao ano grazas aos anuncios de prostitución.

 A boa acollida que tivo na sociedade asturiana este cambio de política de xénero no xornal La Voz de Asturias, só nos fai pensar que a sociedade mariñá recibiría con igual satisfacción esta noticia. Sen dúbida, isto redundaría nunha maior confianza da cidadanía da Mariña tocante aos medios de comunicación escritos a través dos que se informa.

 


Como xa sabedes, o pasado día 8 de marzo – con motivo da conmemoración do día das Mulleres – o Observatorio da Mariña pola Igualdade cumpriu os seus primeiros dous anos de andaina feminista. Para celebralo, fómonos de cea ao mesón A Maseira, en Foz, onde estivemos de festa ate altas horas!

Previamente celebramos unha Asemblea de Socios/as na casa do mar de Foz, na cal demos conta das actividades realizadas até o momento, da situación económica e das futuras actividades e proxectos que temos en mente para este 2010. Repartimos a todos/as os/as asistentes o libriño -memoria “Dous anos mirando pola igualdade”, así como chapas, autocolantes co lema “Eu tamén son feminista” e almanaques de peto do 2010.

Como xa vos dixemos no post anterior, moitas grazas a todas as persoas que nos seguides e apoiades! Coa vosa axuda,  colaboración e ilusión seguiremos a traballar  a prol da igualdade na Mariña!

Velaquí tedes unha mostra gráfica da cea do venres.

 


O próximo 8 de marzo, coincidindo co día da Muller Traballadora, celebramos o noso segundo aniversario!!!

Durante estes dous anos de andaina feminista, desde o Observatorio da Mariña pola Igualdade,  organizamos máis de vinte actividades entre campañas informativas, charlas-café, obradoiros, videoforum, talleres, cursos, etc. Os/As seguidores/as do blog sabedes do que falamos!!

Para celebralo irémonos de cea o próximo venres día 5. A cita terá lugar no restaurante A Maseira, en Foz. Antes da festa terá lugar unha Asemblea Xeral de socios/as na casa do mar de Foz, na que daremos conta do traballo realizado ate o momento, faremos balance da situación actual da asociación e presentaremos a memoria 2008-2010, que se entregará aos soci@s en forma de libriño. Por último, valoraranse as actividades propostas para o 2010.

Moitas grazas a todas as persoas que nos seguen e que, dun xeito ou outro, colaboran con nós. E, por suposto, ás mulleres mariñás que ao longo destes dous anos participaron nas actividades que realizamos nos distintos concellos da Mariña de Lugo!CONTINUAREMOS TRABALLANDO POLA IGUALDADE NA MARIÑA.

 


HOMES POR UN DÍA

02 20th, 2010

O pasado xoves día 18 tivo lugar, na Casa do Mar de Foz, o obradoiro “Ser home por un día”, impartido pola compañía teatral Chévere. Coa axuda das actrices Patricia de Lorenzo e Natalia Outeiro, e máis da maquilladora Estefanía Bello, as mulleres asistentes ao obradoiro convertémonos, por unhas horas, en homes.  

O taller teatral contou con dúas partes. Nunha primeira reflexionouse sobre o funcionamento dos roles tradicionais de xénero e sobre como estes limitan as nosas vidas. Neste sentido, analizouse o xénero como construción social e cultural, non natural nin innato nas persoas e, xa que logo, susceptíbel de ser modificado. Aplicándomonos a teoría, comezamos por aprender a ocupar o espazo, camiñar, falar, sorrir, xesticular, etc como homes, para despois mudarmos as nosas roupas por vestimentas masculinas e, coa axuda das profesionais de Chévere, caracterizarmos as nosas caras con barbas, patillas, perillas ou bigotes.

 

 

A segunda parte do taller teatral tivo lugar en distintos bares de Foz, procurando a interacción cos presentes. Deste xeito Suso, Carlos, Mario, Nando, Toño, Tito, Fran, Brais e o resto de compañeiros puxeron a proba as súas novas identidades.

 

“Ser home por un día” resultou unha experiencia moi interesante que nos fixo reflexionar sobre os roles e estereotipos de xénero. Animádevos, as participantes no obradoiro, a contar a vosa experiencia deixando un comentario!!!!!!!


A experiencia para-teatral terá lugar na Casa do Mar de Foz (Paseo da Ribeira)  o vindeiro xoves 18, entre as 16 e as 22 horas

 O Observatorio da Mariña pola Igualdade trae a Foz o obradoiro para-teatral SER HOME POR UN DÍA, impartido pola compañía teatral Chévere, unha actividade que promove o cambio de roles de xénero por parte das mulleres para descubriren, por un día, que se sente sendo home.

O prazo de inscrición para o obradoiro permanecerá aberto até o vindeiro martes 16 (martes de Entroido), e para anotarse abonda con enviar un correo electrónico a observatorioigualdade@gmail.com.

A actividade está dirixida preferentemente ás socias do Observatorio, e aquelas mulleres que desexen participar sen seren socias, terán que aboar 20 euros en concepto de matrícula (importe equivalente á cota anual de socia). Deste xeito, desde o Observatorio intentamos por unha banda ofrecer actividades ao un tempo lúdicas e formativas para as socias, así como mostrarlle á cidadanía a importancia que a súa contribución ten na consolidación de redes fluídas no asociacionismo mariñán.

 As mulleres que desexen participar deben levar a roupa de home que necesite para crear a súa identidade masculina (tamén gorras, calzado, gafas, garabatas, etc.). Debe levar tamén gomina para o pelo, unha venda elástica (mínimo de 10 cm. de ancho e 10 m. de longo) para disimular o peito e unhas tesoiras pequenas.

 Durante o obradoiro para-teatral, as actrices Patricia de Lorenzo e Natalia Outeiro e máis a maquilladora Estefanía Bello, da compañía teatral Chévere,  traballan con cada unha das participantes para crear unha nova identidade masculina e para acadar unha experiencia colectiva de emancipación de xénero.

O que se quere propoñer é un cambio de papeis. Por un día, polo menos, asumirán o personaxe do outro, para concienciarse de que o xénero é algo construído e, polo tanto, modificable. Apréndese así ocupar o espazo, camiñar, comer, beber, coller obxectos, sorrir, falar, etc., como homes. As participantes relacionaranse entre si como as súas personaxes e investigarán novos comportamentos. Remátase cunha visita a un lugar público como un bar, onde se poñen a proba as novas identidades.

Para máis información poden visitar a páxina:  www.grupochevere.eu


Goretti Sanmartín e Olga Castro estiveron no pub Panadeiras de San Cibrao este venres 23 de outubro para debater sobre a cuestión da lingua desde unha perspectiva de xénero, dentro do ciclo de charlas-café FALEMOS DE…

Co título de “XÉNERO E IDIOMA: QUEREMOS GALEGO, QUEREMOS IGUALDADE!” ambas as dúas expertas reivindicaron a unión da causa a prol do galego e da causa feminista. Así, abordaron cuestións como a influencia que ser muller ou home ten nos usos lingüísticos do galego, a importancia de que as políticas de normalización lingüística do galego teñan en conta as pautas de linguaxe non sexista, a violencia que supón culpabilizar ás mulleres da perda de falantes pola non transmisión interxeracional da lingua ou a tamén actitude violenta de negarlles ás nenas (máis cós nenos) a aprendizaxe da lingua propia.

goretti&olga

P1020386

goretti sanmartín e olga castro

goretti sanmartín e olga castro

P1020380


A partir das 20.30 horas o pub “Panadeiras” acollerá esta iniciativa, a primeira que o Observatorio organiza en San Cibrao, na que intervirán as expertas en lingüística feminista Goretti Sanmartín e Olga Castro

Dentro do grande debate sobre o idioma que se está a vivir na sociedade galega nos últimos meses, o Observatorio da Mariña pola Igualdade propón abordar que implicacións ten o uso dun ou outro idioma desde a perspectiva de xénero. Deste xeito, co título de “FALEMOS DE… XÉNERO E IDIOMA: QUEREMOS GALEGO, QUEREMOS IGUALDADE”, a asociación feminista comarcal leva a San Cibrao a súa iniciativa das charlas-café, no que será a primeira actividade que desenvolven nesta vila. A cita será este venres día 23 a partir das 20.30 horas, no pub PANADEIRAS (rúa Aduana), en San Cibrao.

Na charla-café intervirán Goretti Sanmartín Rei, doutora e profesora en Filoloxía Galega e actualmente directora do Servizo de Normalización Lingüística da Universidade da Coruña e Olga Castro Vázquez, investigadora da Universidade de Vigo experta en xénero e linguaxe, e vicepresidenta do Observatorio da Mariña pola Igualdade. As relatoras abordarán como ser muller ou home inflúe nos usos lingüísticos en galego, e tratarán así mesmo a linguaxe sexista e as pautas do galego non sexista.

O ciclo de charlas-café FALEMOS DE… é unha actividade a través da que periodicamente se debaten en diferentes vilas da comarca sobre temas relevantes para avanzar na igualdade de xénero. Así pois, a iniciativa ten como propósito de dar a coñecer as problemáticas que afectan de forma específica ás mulleres da comarca, enfocando a realidade da nosa contorna desde unha perspectiva de xénero que teña en conta as particularidades coas que mulleres e homes vivimos cada situación social. Por este motivo, están abertas e dirixidas a mulleres e homes.

A actividade resulta innovadora de seu na nosa comarca, pero ademais presenta o aliciente de ter un formato ameno e participativo. Así, lonxe do formato de conferencia convencional, o ciclo de charlas-café FALEMOS DE… busca a interacción das relatoras cos homes e mulleres do público nun ambiente agradábel e acolledor, onde ao mesmo tempo que se escoitan as intervencións se poida tamén tomar unha consumición.

Logo de ter tratado temas como “A repercusión da crise económica nas mulleres” en Ribadeo, “O aborto a debate” e “Mulleres no Deporte” en Burela ou “A segregación por sexos nas aulas” en Foz, nesta ocasión a cita ten lugar en San Cibrao. No mes de decembro retomaranse as charlas-café para abordar “A endometriose, a enfermidade que afecta ao 10% das mulleres” de novo en Ribadeo.

FalemosDe_Xenero&Idioma


Nas sesións, que se desenvolverán na UNED durante cinco venres pola tarde a partir do día 30, visionaranse cinco filmes estranxeiros para invitar a reflexionar desde unha perspectiva de xénero sobre realidades sociais e culturais diferentes á galega

 

MULLERES NO MUNDO” é o título da nova actividade que organiza o Observatorio da Mariña pola Igualdade, en colaboración coa aula universitaria da UNED e con Radiofoz, para achegarlle mediante o cinema á cidadanía mariñá e galega a realidade vital de mulleres moi diversas pertencentes a ámbitos sociais e culturais afastados e distantes.

O vídeo-forum “MULLERES NO MUNDO” desenvolverase nas aulas da UNED de Foz durante cinco venres consecutivos, a partir do día 30 de outubro, en horario de 19 a 21 horas. O prazo de inscrición está xa aberto, e na actividade poden anotarse todas as persoas que o desexen, aínda que para as alumnas e alumnos da UNED estanse a tramitar créditos de libre configuración. Quen desexe inscribirse na actividade, totalmente gratuíta, debe pórse en contacto coa UNED de Foz, ben escribindo un correo electrónico a foz@lugo.uned.es, chamando por teléfono ao 982133699 ou acudindo presencialmente ás aulas da universidade en Foz (sitas na rúa Castelao, s/n).

As sesións de “MULLERES NO MUNDO” estarán guiadas por membras do Observatorio da Mariña pola Igualdade. A metodoloxía a seguir consiste en realizar unha breve presentación e contextualización do filme,  para a continuación realizar o visionado da película que corresponda a cada día:

● 30 de outubro: Mooladé (Protección). Dirección de Ousmane Sembene, Senegal.

● 6 de novembro: Kandahar. Dirección de Mohsen Makhmalbaf, Afganistán.

● 13 de novembro: Grbavica. El secreto de Esma. Dirección de Jasmila Zbanic, Serbia.

● 20 de novembro: El círculo. Dirección de Jafar Panahi, Irán.

● 27 de novembro: Caramel. Dirección de Nadine Lebaki, Líbano.

A continuación, realizarase un debate e reflexión posterior sobre diferentes aspectos abordados en cada filme, seguindo sempre unha metodoloxía participativa e aberta na que a monitora sexa condutora das reflexións do grupo.

O principal obxectivo que persegue o Observatorio da Mariña pola Igualdade con esta iniciativa é a de darlle a coñecer á cidadanía galega, homes e mulleres, as realidades vitais de mulleres moi diversas de Senegal, Afganistán, Serbia, Irán e Líbano. Deste xeito, pretendemos destacar, por un lado, que a discriminación de xénero é unha cuestión universal que afecta a todas as mulleres do mundo, aínda que adquire unhas materialización diferentes en función das continxencias que definen cada sociedade e cultura. E polo outro, que non hai un único xeito de “ser muller” nin unha esencia feminina, senón que a pluralidade de experiencias vitais e de desexos das mulleres obríganos a ter sempre en conta a enorme diversidade de mulleres. Alén deste obxectivo principal, desde o Observatorio preténdese tamén contribuír a pór en valor as contribucións das mulleres aos distintos eidos do saber, destacando neste caso o traballo das directoras de cinema.

Mª Fuensanta Otero Beltrán

Coordinadora da UNED Aula Universitaria de Foz

Rúa Castelao s/n-27780 Foz

Tlfno.: 982.133.699

 

Más información de la UNED-Aula Universitaria de Foz

http://www.unedaulafoz.blogspot.com

Cartel_Cine_Forum_Femenino_1


Na cuarta charla-café FALEMOS DE… organizada polo Observatorio da Mariña pola Igualdade reflexionamos sobre a segregación por sexos nas aulas desde unha perspectiva de xénero. Tivemos a sorte de contar coa participación da doutora en psicopedagoxía, profesora da Universidade da Coruña e experta en coeducación Ana Sánchez Bello, e tamén da responsábel comarcal da Mariña da CIG-Ensino Dores Fernández Abel.

charla-cafe 9 outubro 006

charla-cafe 9 outubro 008


Este venres día 9 en Foz levarase a cabo a cuarta sesión das charlas-café “Falemos de..” organizadas pola asociación, Observatorio da Mariña pola Igualdade.

Dentro do gran debate sobre a educación que se está a vivir na sociedade galega e na española nos últimos meses, o Observatorio da Mariña pola Igualdade o que propón con esta charla , é abordar o tema da SEGREGACIÓN POR SEXOS NAS AULAS, dita charla, será este venres día 9 no Restaurante ” A Caracola” en Foz as 20:00 horas.

 

As poñentes que estarán presentes será, Ana Sánchez Bello, doutora en psicopedagoxía e profesora titular da facultade de Ciencias da Educación na Universidade da Coruña, experta en temas de coeducación e autora de numerosas publicacións sobre o tema, e máis Dores Fernández Abel, presidenta da asociación cultural Francisco Lanza e Secretaria Comarcal da CIG ensino na Mariña Lucense.

FalemosDeSegregaciónSexoAulas_