Archive for the 'CRÓNICAS' Category

Como xa sabedes, o pasado día 8 de marzo – con motivo da conmemoración do día das Mulleres – o Observatorio da Mariña pola Igualdade cumpriu os seus primeiros dous anos de andaina feminista. Para celebralo, fómonos de cea ao mesón A Maseira, en Foz, onde estivemos de festa ate altas horas!

Previamente celebramos unha Asemblea de Socios/as na casa do mar de Foz, na cal demos conta das actividades realizadas até o momento, da situación económica e das futuras actividades e proxectos que temos en mente para este 2010. Repartimos a todos/as os/as asistentes o libriño -memoria “Dous anos mirando pola igualdade”, así como chapas, autocolantes co lema “Eu tamén son feminista” e almanaques de peto do 2010.

Como xa vos dixemos no post anterior, moitas grazas a todas as persoas que nos seguides e apoiades! Coa vosa axuda,  colaboración e ilusión seguiremos a traballar  a prol da igualdade na Mariña!

Velaquí tedes unha mostra gráfica da cea do venres.

 


Goretti Sanmartín e Olga Castro estiveron no pub Panadeiras de San Cibrao este venres 23 de outubro para debater sobre a cuestión da lingua desde unha perspectiva de xénero, dentro do ciclo de charlas-café FALEMOS DE…

Co título de “XÉNERO E IDIOMA: QUEREMOS GALEGO, QUEREMOS IGUALDADE!” ambas as dúas expertas reivindicaron a unión da causa a prol do galego e da causa feminista. Así, abordaron cuestións como a influencia que ser muller ou home ten nos usos lingüísticos do galego, a importancia de que as políticas de normalización lingüística do galego teñan en conta as pautas de linguaxe non sexista, a violencia que supón culpabilizar ás mulleres da perda de falantes pola non transmisión interxeracional da lingua ou a tamén actitude violenta de negarlles ás nenas (máis cós nenos) a aprendizaxe da lingua propia.

goretti&olga

P1020386

goretti sanmartín e olga castro

goretti sanmartín e olga castro

P1020380


Na cuarta charla-café FALEMOS DE… organizada polo Observatorio da Mariña pola Igualdade reflexionamos sobre a segregación por sexos nas aulas desde unha perspectiva de xénero. Tivemos a sorte de contar coa participación da doutora en psicopedagoxía, profesora da Universidade da Coruña e experta en coeducación Ana Sánchez Bello, e tamén da responsábel comarcal da Mariña da CIG-Ensino Dores Fernández Abel.

charla-cafe 9 outubro 006

charla-cafe 9 outubro 008


A cervexaría Tapiñas de Burela acolleu na noitiña do xoves día 25 de xuño a segunda sesión co ciclo de charlas-café organizado polo Observatorio da Mariña pola Igualdade, co tema “FALEMOS DE… O ABORTO A DEBATE!”. Nun ambiente do máis ameno e acolledor, máis de 30 persoas escoitaron e tomaron parte dun debate moi participativo coa histórica do feminismo galego Lupe Ces e con Mariola Mourelo (ambas as dúas da Marcha Mundial das Mulleres), Beni Martínez  (sexóloga e matrona) e Luísa González (xurista especializada en xénero, ademais de fundadora e presidenta do Observatorio da Mariña pola Igualdade). O debate prolongouse até case as once da noite.

Charla-Café "Falemos de... O aborto a debate" 2

Charla-Café "Falemos de... O aborto a debate!" 1

Charla-Café "Falemos de... O aborto a debate" 3


O Observatorio da Mariña pola Igualdade sumouse aos actos de sensibilización contra a violencia de xénero promovendo unha acción teatral de rúa, que tivo lugar o sábado 22 de novembro en Foz. O acto foi moi emotivo, e nel participaron medio cento de persoas que quixeron amosar a súa repulsa ante este tipo de violencia que parte do carácter estrutural que ten a discriminación de mulleres na sociedade.


Untitled from Observatorio Igualdade on Vimeo.

Entre lusco e fusco, ás seis da tarde a cor negra apoderouse da rúa peatonal Xoán Montes. Tamén de negro ían enfundadas as participantes representación teatral, unha cor que só quedou rachada polas luvas brancas e as caretas tamén brancas que lles cubrían o rostro. A música comezou e as figuras quedaron inmóbiles no improvisado escenario no que se converteu unha lona negra. Ao pouco, unha a unha as participantes partían da súa imaxe estática para recoller unha das infinitas esquelas das mulleres asasinadas en actos de violencia de xénero. Coa esquela na man, camiñaban cara ao público para mostrarlle o nome, idade e cidade da vítima. Logo pousaban a esquela no chan e colocábanlle enriba o par de zapatos de levaban postos, como sinal de recordo por cada unha das vítimas. Zocas, botas, tenis, zapatos de tacón de agulla, zapatillas de casa, chanclas da praia, bambas, ‘francesitas’ ou katiuskas compartían escenario en Foz, como xeito tamén de reflectir os diferentes tipos de mulleres que morreron asasinadas no estado español no que levamos de ano polo único feito de seren mulleres. Porque calquera muller, polo feito de selo, é vítima potencial desta lacra social. Por iso, o manifesto co que se puxo final ao acto, foi contundente: QUEREMOS VIVIR NUNHA MARIÑA SEN VIOLENCIA DE XÉNERO, NUNHA GALIZA SEN VIOLENCIA DE XÉNERO, NUN MUNDO SEN VIOLENCIA DE XÉNERO.

Acción teatral

Acción teatral 3


Ás 20.30 horas do pasado venres 10 de outubro, no salón de actos da Casa do Mar de Burela non cabía nin un alfinete. Malia que as prazas eran limitadas e malia que para participar no Tuppersex era necesario terse inscrito previamente, moitas persoas uníronse no último momento á iniciativa facendo que o aforo do salón de actos quedase pequeno. E é que a sexualidade é un tema abondo importante do que non é doado ter oportunidade de informarse e formarse, e de aí a excelente acollida desta iniciativa organizada polo colectivo feminista Observatorio da Mariña pola Igualdade, coa colaboración da Delegación de Igualdade do Concello de Burela. O grupo de persoas que participaron no obradoiro foi do máis heteroxéneo, abranguendo a moitas mulleres e numerosos homes desde os 18 até os 70 anos que foron, e niso si que coincidiron, moi participativas e participativos. A especialista encargada de impartir o obradoiro foi Natalia Domínguez, pedagoga, técnica de igualdade e taperseira galega da tenda erótica Los Placeres de Lola.

Tuppersex Burela

Tuppersex Burela

Desde o comezo Domínguez deixou claro o obxectivo primordial do Tuppersex: reaprender a sexualidade desde unha perspectiva feminista, superando así o modelo androcéntrico e dominante do sexo que tan interiorizado temos. Para iso cumpría, en primeiro lugar, saber que o clítoris é un órgano do corpo das mulleres cuxa única e exclusiva función é dar pracer. E cumpría tamén, en segundo lugar, “desxenitalizar” a sexualidade deixando a un lado os órganos xenitais para descubrir moitos outros órganos sexuais que son fonte de pracer, como por exemplo a pel. Para sacarlle o máximo proveito a estoutras zonas eróticas dos nosos corpos, a experta en sexualidade mostrou o uso de infinidade de produtos como aceites; xeles de masaxe; chocolate para pintar o corpo (comestíbel!); lubricantes; bólas chinesas (que teñen ademais beneficiosas propiedades terapéuticas, fortalecendo os músculos púbicos para previr a incontinencia urinaria); masaxeadores con vibrador (algúns mesmo somerxíbeis); pequenos vibradores disfrazados de pintabeizos; aneis de plástico para favorecer que durante a penetración a zona do clítoris sexa estimulada; artigos de bondage como plumas, xávegas ou vendas para privar á ou ao noso amante dalgún dos sentidos; dildos das máis variadas formas e tamaños; e por suposto o libro Los Placeres de Lola onde se explican os mesmos conceptos que nos obradoiros presenciais pero con moita máis profundidade.

Alén diso, o Tuppersex tamén tiña como obxectivo desterrar falsos mitos sobre a sexualidade que con frecuencia limitan a vida sexual plena das persoas. En contra do pensamento dominante, a exaculación feminina existe, o clímax sexual das mulleres non radica na vaxina (senón no clítoris) e o sexo anal pode ser tamén fonte de pracer, xa que o ano é unha das zonas do corpo con máis terminacións nerviosas e por tanto máis sensíbeis ao pracer. Para iso, explicou Domínguez, cómpre lubricalo moito e ben (porque ao contrario da vaxina non lubrica por si mesmo), e no caso de usar algún tipo de xoguete erótico é moi importante que teñan unha base ou tope que impida que poidan quedar no interior.

A seguridade na sexualidade era o terceiro grande obxectivo do obradoiro. Amais do popular preservativo masculino, a especialista en sexualidade mostrou o uso do preservativo feminino, así como dos dams ou parches de látex para protexerse das infeccións nas prácticas de sexo oral. Tamén nesta liña Domínguez mostrou o uso da copa menstrual (www.mooncup.co.uk), uns soportes de silicona para uso vaxinal durante a regra, reutilizábeis constantemente durante os días de período durante quince anos nos que non haberá que mercar nin tampóns nin compresas.

Produtos de Tuppersex

Produtos de Tuppersex

Logo das dúas horas de obradoiro, a especialista en sexualidade explicou o procedemento para facer os pedidos dos produtos eróticos á tenda Los Placeres de Lola. Quen non o fixera ao remate do Tuppersex, pode facelo a través da páxina web da tenda www.losplaceresdelola.com, indicando que acudiu ao Tuppersex de Burela (Lugo) o 10 de outubro de 2008, organizado polo Observatorio da Mariña pola Igualdade e impartido pola taperseira Natalia Domínguez.

Houbo tamén persoas que se interesaron polo proceso a seguir para organizar unha reunión-demostración Tuppersex máis íntima nas súas casas, seguindo o que é a verdadeira filosofía Tuppersex. Aínda que as indicacións están na páxina web, Domínguez explicou que calquera persoa maior de 18 anos pode organizalo sempre e cando os grupos que se reúnan sexan ou ben exclusivamente de mulleres ou ben mixtos, e sempre e cando ao final da reunión entre todas as persoas se realice un consumo mínimo de 200 euros en produtos da tenda. A xornada rematou pasadas as 23 horas co reparto gratuíto de preservativos masculinos de sabores, por xentileza do centro Quérote de Burela.

Mulleres e homes asistentes ao Tuppersex en Burela

Mulleres e homes asistentes ao Tuppersex en Burela