O Observatorio da Mariña pola Igualdade participou, o pasado día 13 en Burela, na homenaxe a Rosalía de Castro que no 125 aniversario da súa morte organizaron as asociacións mariñás Francisco Lanza (Ribadeo), Ollomao (Barreiros), A Pomba do Arco (Foz), Buril (Burela), Arricandeira (Riotorto), O Milleiro (Ourol), Irmandade  San Caetano (Celeiro de Mariñaos), Mardouro (Valadouro), Anduriña (San Cibrao) e Mariña Patrimonio.

Con este acto quíxose, amais de conmemorar os 125 anos do seu pasamento,  poñer en valor a obra e a figura de Rosalía e reivindicar o carácter público, aberto e laico do Panteón de Galegas e Galegos Ilustres, situado en San Domingos de Bonaval (Santiago de Compostela). Para elo, o escritor e xornalista Miguel Sande, o artista barreirense Celso Dourado e a compañeira do Observatorio Olga Castro, puxeron voz a distintos textos de Rosalía.  

Olga Castro fixo fincapé no discurso máis combativo de Rosalía, desde un punto de vista de xénero. A  pesar de que este está presente en toda a obra da escritora de Padrón, a nosa compañeira centrouse só nalgunhas obras en prosa onde o discurso é máis explícito. En palabras de Olga Castro “en Lieders, obra que a estudosa e tradutora de Rosalía ao inglés, Kathleen March, cualificou como “o primeiro manifesto feminista da Galiza”, a nosa autora afirma:

Só cantos de independencia e liberdade balbuciron os meus labios, aínda que ao meu arredor sentise, desde o berce xa, o ruído das cadeas que debían aprisionarme para sempre, porque o patrimonio da muller son os grillóns da súa escravitude.”

 Olga tamén fixo referencia á obra “Las literatas. Carta a Eduarda”, na que Rosalía “denuncia os obstáculos que atopa unha muller que decide dedicarse á literatura; a dificultade da conciliación entre vida social e literaria, coa vida familiar; como as obras de moitas escritoras da época foron usurpadas polos seus maridos (quen as asinaban); e, en definitiva, o sometemento ao xuízo dos demais que sempre lle critican calquera actuación” Como di Rosalía nesta obra “Pero non creas que para aquí o mal, pois unha poeta ou escritora non pode vivir humanamente en paz sobre a terra, posto que, ademais das axitacións do seu espírito, ten as que ao seu arredor levantan cantos a arrodean”.

Após as intervencións de O. Castro, Celso Dourado e Miguel Sande  a agrupación musical burelá Dandara pechou o acto coa interpretación dunha peza tradicional.


Despois de debater sobre a lingua, o deporte, o aborto, a educación, a economía, etc o pasado venres tivo lugar en Burela a charla-café “Falemos de…Mulleres e saúde: a endometriose”. Chus Méndez e Ana Touriño faláronnos desta enfermidade – que consiste na aparición e crecemento de tecido endometrial fóra do útero-  que padecen 5 de cada 10 mulleres en idade fértil e da que apenas ouvimos nada na nosa vida cotiá. Chus Méndez, xinecóloga do Centro de Especialidades do Complexo Hospitalario Xeral Calde de Lugo, puxo sobre a mesa o punto de vista médico mentres que Ana Touriño deu a súa visión da enfermidade desde un punto de vista sociolóxico, mais tamén como afectada.

A charla-café prolongouse durante máis de dúas horas. Ao longo da mesma púxose de manifesto a maneira na que esta enfermidade altera a calidade de vida das afectadas no tocante as súas relacións de parella, laborais, de reproducción, etc, e tamén a dificultade do seu diagnóstico e tratamento. Ademais, varias afectadas que se atopaban entre o público deron a súa visión particular sobre a enfermidade e fixéronnos partícipes da súa experiencia, contribuindo a facer a charla-café aínda máis interesante e participativa.

 


O vindeiro venres 18, a partir das 20.30 horas, o Observatorio da Mariña pola Igualdade retoma o ciclo de charlas-café FALEMOS DE…. que nesta ocasión terá lugar no café-bar A Fazenda de Burela (Rúa Lamestra, 19), que estrea as súas instalacións da terraza de verán para a ocasión.

 O tema escollido para a sexta cita deste ciclo é  MULLERES E SAÚDE: A ENDOMETRIOSE, e así preténdese arroxar luz sobre a doenza da ENDOMETRIOSE, unha enfermidade relativamente común pero moi descoñecida e aínda moi infradiagnosticada que pode afectar a calquera muller en idade fértil. Na sesión participará Chuz Méndez, xinecóloga do centro de Especialidades do Complexo Hospitalario Xeral Calde de Lugo, e Ana Touriño, que achegará unha visión sociolóxica sobre a doenza.

Con esta cita o Observatorio quere retomar a proposta deste ciclo de charlas, logo da excelente acollida que tiveron as anteriores sesións celebradas durante o ano 2009 e nas que se abordaron os temas da “Repercusión da crise económica nas mulleres” en Ribadeo, “O aborto a debate” e “Mulleres e deporte” en Burela, “A segregación por sexo nas aulas” en Foz e “Xénero e idioma” en San Cibrao. 

O ciclo de charlas FALEMOS DE… é unha actividade a través da que periodicamente se debaten en diferentes vilas da comarca sobre temas relevantes para avanzar na igualdade de xénero, polo que están abertas e dirixidas a toda a cidadanía (mulleres e homes). A actividade resulta innovadora de seu na nosa comarca, pero ademais presenta o aliciente de ter un formato ameno e participativo. Así, lonxe do formato de conferencia convencional, o ciclo de charlas-café FALEMOS DE… busca a interacción das relatoras cos homes e mulleres do público nun ambiente agradábel e acolledor, onde ao mesmo tempo que se escoitan as intervencións se poida tamén tomar unha consumición.

 Deste xeito, o Observatorio quere afondar no seu obxectivo de dar a coñecer as problemáticas que afectan de forma específica ás mulleres da comarca, enfocando a realidade da nosa contorna desde unha perspectiva de xénero que teña en conta as particularidades coas que mulleres e homes vivimos cada situación social.

ESPERÁMOSVOS!!


“Como xa sabíades, durante este último trimestre do curso escolar estivo levándose a cabo por diversos IES da Mariña de Lugo a campaña Dándolle a Volta. Xa vos falamos da experiencia no IES Marqués de Sargadelos, de San Cibrao, e agora  – durante o mes de maio – tocoulle o turno ao IES Perdouro de Burela e ao IES Dionisio Gamallo Fierros, de Ribadeo. Traballamos con alumnado de 2º, 3º e 4º da ESO a construción da identidade de xénero, os roles e estereotipos sexistas, a socialización diferenciada que se nos dá a homes e mulleres dende o momento do nacemento e a violencia de xénero, incidindo neste último caso nos modos en que se dá e posibles abordaxes para a súa prevención.

 No próximo curso académico esperamos seguir traballando coa nosa mocidade xa que nos parece fundamental a educación en igualdade da xente máis nova. Deixámosvos con algunha foto dos obradoiros, neste caso no IES Perdouro.


Máis de 30 persoas participaron no obradoiro Tuppersex que o Observatorio da Mariña pola Igualdade organizou na Casa do Mar ribadense o pasado venres 21 de maio. Como indicara xa nunha acción semellante que tivera lugar en Burela no 2008, cos obradoiros Tuppersex quérese que as mulleres teñamos a oportunidade de reaprendermos a sexualidade desde unha perspectiva feminista, superando así o modelo androcéntrico e dominante do sexo que tan interiorizado temos, e combatendo moitos falsos mitos que existen socialmente sobre a sexualidade feminina e que con frecuencia limitan a nosa vida sexual. O interese que espertou a actividade nas persoas participantes quedou en evidencia pola participación das presentes e a duración do mesmo, que acabou estendéndose ata as tres horas de duración. Deixámosvos con algunhas fotos do mesmo.

 

 


E non paramos!! Despois do éxito da I Escola de Formación Feminista Corona González abrimos o prazo de inscrición ao obradoiro de sexualidade TUPPERSEX  que terá lugar en ribadeo o próximo venres día 21 ás 19.00 horas!

Todas as mulleres e homes maiores de 18 anos poden reservar xa a súa praza para participar o vindeiro venres 21 de maio de outubro, a partir das 19 horas, no obradoiro de sexualidade TUPPERSEX, que terá lugar na Casa do Mar de Ribadeo. Para iso, simplemente deben chamar ao teléfono do Observatorio 627037668 ou ben enviar un correo electrónico a observatorioigualdade@gmail.com, sempre antes do xoves día 20.

 A actividade, organizada polo Observatorio da Mariña pola Igualdade coa colaboración da Delegación de Igualdade do Concello de Ribadeo, será impartida por Natalia Domínguez, membra da asociación e tenda erótica Los Placeres de Lola. Esta será a segunda ocasión na que Los Placeres de Lola visita A Mariña, logo de teren estado en Burela en outubro de 2008 para impartir un multitudinario obradoiro de sexualidade organizado tamén polo Observatorio da Mariña pola Igualdade. (Poden ler a crónica en http://observatorioigualdade.blogaliza.org/2008/10/ )

 O principal obxectivo do obradoiro TUPPERSEX é favorecer cunha metodoloxía lúdica e formativa, e desde unha perspectiva feminista, o autocoñecemento da anatomía fisiolóxica de cadaquén, para rachar cos falsos mitos, tabús e prexuízos que existen arredor do sexo contribuíndo a que tanto mulleres como homes poidan coñecer mellor a súa sexualidade. O obradoiro busca tamén facilitar a adquisición, desenvolvemento e interiorización de hábitos sexuais saudábeis e seguros, así como a mellora da autoestima.

 O outro propósito do TUPPERSEX é presentar os diferentes xoguetes sexuais que existen no mercado mostrando as posibilidades do seu uso erótico, para que as persoas que o desexen poidan mercalos. En efecto, o TUPPERSEX debe o seu nome a esta segunda finalidade, xa que ten a súa orixe nas chamadas demostracións de ‘Tupperware’ tan comúns nas décadas pasadas, nas que varias persoas se reunían para apreciar a versatilidade e funcionalidade dun determinado produto, tendo posteriormente opción a mercalo. Los Placeres de Lola leva anos organizando ou participando en obradoiros de sexualidade TUPPERSEX, todos eles moi concorridos e de enorme éxito.

Esperámosvos!!


Ola de novo a tod@s! Xa estamos de volta de Lugo onde, como xa sabedes, tivo lugar esta fin de semana a I Escola de Formación Feminista Corona González. A verdade é que estamos moi content@s co resultado e, desde aquí, queremos dar as grazas a todas as persoas que participaron e se animaron a vir con nós!

Ao final fomos unha trintena de asistentes os/as que estivemos debatindo e reflexionando, dende un enfóque de xénero, de cuestións tan actuais como a importancia do movemento feminista no mundo en Galiza, a saúde e a medicina, así como as violencias de xénero visíbeis e invisíbeis. Os obradoiros formativos complementáronse con actividades de benestar relacionadas coas augas termais, e así as persoas participantes poidemos gozar de circuítos termais que incluíron sauna seca, sauna húmida, contrastes de auga fría e quente, piscina termal, jacuzzi e sillóns térmicos nos que se aplicou un bálsamo relaxante. Amais,  aproveitamos para facer unha visita cultural ás termas romanas milenarias, ubicadas na parte baixa do balneario.

O balance destes dous días realizado por Luísa González, presidenta do Observatorio da Mariña pola Igualdade, é que se tratou dun encontro “moi positivo, gratificante e enriquecedor non só para o propio Observatorio, senón tamén para todas e todos os asistentes, a xulgar polas valoracións tan optimistas que nos transmitiron na folla de avaliación final”. Unha constante nas valoracións das e dos participantes é que, segundo González, “as persoas que participaron nesta primeira edición manifestaron que lles gustaría repetir a experiencia, alongando ademais o tempo de estadía no balneario así como o tempo dedicado aos debates e foros de reflexión, que a moita xente se lles fixeron curtos”, explicou. Por ese motivo, nas súas palabras, “a segunda edición da Escola de Formación Feminista Corona González xa figura no cronograma de actuacións do Observatorio. A propia consolidación da actividade contribuirá tamén ao noso obxectivo de darlle máis visibilidade á figura de Corona González, unha intelectual galega de comezos do século XX cunha clara conciencia feminista e nacional, e moi vinculada á vila de Ribadeo, cuxo importante labor fica aínda no esquecemento”.


Como xa sabedes, o próximo 8 e 9 de maio terá lugar, no Balneario de Lugo, a I Escola de Formación Feminista Corona González. Animádevos, que aínda estades a tempo!!

A cita está aberta a todas as persoas que o desexen. O prezo é de 59 euros (50 para socios e socias) e inclúe o aloxamento da noite do 8 de maio, o almorzo do día 9 e un circuíto termal con sauna seca, sauna húmida, contrastes de auga fría e quente, piscina termal, jacuzzi e sillóns térmicos nos que se aplicará un bálsamo relaxante nas pernas. A data límite para anotarse é até o próximo luns 26 de abril e se poderá facer a través do mail observatorioigualdade@gmail.com ou no teléfono 627037668

Programa:

Sábado 8 de maio:

16.00h: recepción

16.00 – 17.00h: presentación

17.00 – 18.30h: Obradoiro formativo sobre “Feminismos e Movemento Feminista”

18.30 – 19.00h: pausa – café

19.00 – 21.00h: circuíto termal

Domingo 9 de maio:

10.30-12.00: Obradoiro formativo sobre “A Saúde desde a Perspectiva de Xénero”

12.00h: pausa – café

12.30 – 13.30h: Obradoiro formativo sobre “As Violencias de Xénero”

13.30: Clausura da I Escola de Formación Feminista Corona González

Esperámosvos!


E para o próximo mes de maio….a I Escola de Formación Feminista Corona González.  Terá lugar os días 8 e 9 de maio no Balneario Hotel de Lugo.

Queríamos conxugar os momentos de ocio coa formación e para iso nada mellor que a I Escola de Formación Feminista Corona González, unha cita diferente que servirá para que todas as persoas que o desexen aproveiten a fin de semana para formarse en cuestións de xénero e igualdade ao tempo que se relaxan e desfrutan dos beneficios das augas termais.

O programa é o seguinte:

Sábado 8 de maio:

16.00h: recepción

16.00 – 17.00h: presentación

17.00 – 18.30h: Obradoiro formativo sobre “Feminismos e Movemento Feminista”

18.30 – 19.00h: pausa – café

19.00 – 21.00h: circuíto termal

Domingo 9 de maio:

10.30-12.00: Obradoiro formativo sobre “A Saúde desde a Perspectiva de Xénero”

12.00h: pausa – café

12.30 – 13.30h: Obradoiro formativo  sobre “As Violencias de Xénero”

13.30: Clausura da I Escola de Formación Feminista Corona González

A cita está aberta a todas as persoas que o desexen. O prezo é de 59 euros (con desconto do 15 % para socios e socias) e inclúe o aloxamento da noite do 8 de maio, o almorzo do día 9 e un circuíto termal con sauna seca, sauna húmida, contrastes de auga fría e quente, piscina termal, jacuzzi e sillóns térmicos nos que se aplicará un bálsamo relaxante nas pernas. A DATA LÍMITE PARA ANOTARSE é até o próximo LUNS 26 de ABRIL e se poderá facer a través do mail observatorioigualdade@gmail.com ou no teléfono 627037668.

Animádevos a unha fin de semana diferente!


Entre o pasado mes de marzo e a primeira semana de abril tiveron lugar os obradoiros Dándolle a Volta no IES Marqués de Sargadelos, en San Cibrao (Cervo).

Dándolle a Volta” é un proxecto do  Observatorio da Mariña pola Igualdade en colaboración coa Fundación Obra Social La Caixa que pretende abordar nos diferentes IES da Mariña as desigualdades existentes entre homes e mulleres na sociedade actual. O  obxectivo principal é favorecer e proporcionar un coñecemento crítico sobre os mecanismos de transmisión de roles e estereotipos na sociedade que nos leven a identificar as causas da violencia contra as mulleres, os modos nos que se dá e as posibles abordaxes para traballar a súa prevención.

En San Cibrao traballouse con alumnado de 3º e 4º da ESO e tratáronse varios temas como a construción da identidade de xénero, os  roles e estereotipos sexistas, a análise dos medios nos que nos socializamos e a violencia nas relacións. Para elo, traballouse co alumnado presentándolle diverso material que deu lugar á reflexión e ao debate, resultando a experiencia moi positiva.

O próximo mes de maio os obradoiros Dándolle a Volta percorreran outros centros da Mariña de Lugo! Manterémosvos informad@s!!